দক্ষিণ কামৰূপ : দক্ষিণ কামৰূপৰ সন্মিলিত জনকল্যাণ মঞ্চ, পলাশবাৰীৰ উদ্যোগত হাইস্কুল শিক্ষান্ত আৰু উচ্চতৰ মাধ্যমিক চুড়ান্ত পৰীক্ষাত সুখ্যাতিৰে উত্তীৰ্ণ কৃতি ছাত্ৰ-ছাত্ৰীলৈ বিশেষ অভিনন্দন অনুষ্ঠান অনুষ্ঠিত হয়। ছয়গাঁও মহাবিদ্যালয়ৰ চম্পকজ্যোতি প্ৰেক্ষাগৃহত অনুষ্ঠিত অনুষ্ঠানত বন্তি প্ৰজ্বলনেৰে অনুষ্ঠান আনুষ্ঠানিকভাৱে মুকলি কৰে বিশিষ্ট সাংবাদিক অতনু ভূঞাই। সাংবাদিক গৰাকীয়ে তেওঁৰ ভাষণত এতিয়াৰ ছাত্ৰ-ছাত্ৰী ভাল ফলাফল দেখুওৱাৰ বাবে আগ্ৰহী বুলি উল্লেখ কৰি এতিয়া ছাত্ৰ-ছাত্ৰী অন্য দিশত পাৰ্গত নহয় বুলি কয়। ছাত্ৰ-ছাত্ৰী সকলক পঢ়াৰ বাবে খুব হেঁচা দিব নালাগে বুলি উল্লেখ কৰি মোবাইল ব্যৱহাৰৰ ভাল দিশও আছে বুলি কয়। সন্মিলিত জনকল্যাণ মঞ্চ, পলাশবাৰীৰ সভাপতি মণিময় কৰৰ সভাপতিত্বত অনুষ্ঠিত সভাত জনকল্যাণ মঞ্চৰ মুখ্য উপদেষ্টা হিমাংশু শেখৰ বৈশ্যই ভাষণ ৰাখি জীৱনৰ এটা লক্ষ্য ৰাখি আগবাঢ়ি যোৱাৰ বাবে ছাত্ৰ-ছাত্ৰী সকলক আহ্বান জনায়। লক্ষ্য অবিহনে সফল হ’ব নোৱাৰি বুলি যুৱ নেতা গৰাকীয়ে ভাষণত উল্লেখ কৰে। বেচৰকাৰী সংস্থাটোৰ জৰিয়তে নিবনুৱা সমস্যা সমাধানৰ বাবে চেষ্টা চলাব বুলি মুখ্য উপদেষ্টা গৰাকীয়ে ভাষণত উল্লেখ কৰে। ছয়গাঁও মহাবিদ্যালয়ৰ জ্যেষ্ঠ অধ্যাপক কমল ঠাকুৰীয়াই কৰ্ম সংস্কৃতিৰ আন্দোলন গঢ়ি তোলাৰ আহ্বান জনায় ছাত্ৰ-ছাত্ৰীয়ে অনুপ্ৰেৰণা লাভ কৰা বক্তব্য প্ৰেৰণ কৰে। সন্মিলিত জনকল্যাণ মঞ্চৰ সম্পাদক ডঃ চিন্ময় কলিতাই আঁত ধৰা অনুষ্ঠানত ছয়গাঁও মহাবিদ্যালয়ৰ অধ্যক্ষ ডঃ নৱ কলিতা, অধ্যাপক ডঃ উপেন ডেকা, ছয়গাঁও দক্ষিণ সৰু বংশৰ জিলা পৰিষদৰ সদস্য মিহি ৰঞ্জন দাস, সমাজকৰ্মী বলেন চন্দ্ৰ মেধি আদি উপস্থিত থাকে। উল্লেখযোগ্য যে আজি পলাশবাৰী সমষ্টিৰ বৃহত্তৰ ছয়গাঁও অঞ্চলৰ প্ৰায় ৬০০ কৃতি ছাত্ৰ-ছাত্ৰীক সম্বৰ্দ্ধনা জ্ঞাপন কৰে। আনহাতে পলাশবাৰী সমষ্টিৰ অন্যান্য ছাত্ৰ-ছাত্ৰীকো সম্বৰ্দ্ধনা জনাব।
