কামৰূপ জিলাৰ চলিত মাহৰ জিলা পথ সুৰক্ষা সমিতিৰ সভাখন আজি কামৰূপৰ জিলা আয়ুক্ত দেৱ কুমাৰ মিশ্ৰৰ সভাপতিত্বত আমিনগাঁওস্থিত সংহত জিলা আয়ুক্ত কাৰ্যালয়ৰ সভাকক্ষত অনুষ্ঠিত হয়। আজিৰ সভাত জিলা আয়ুক্ত দেৱ কুমাৰ মিশ্ৰই চাংসাৰি এলেকাত, বিশেষকৈ শৰাইঘাট মহাবিদ্যালয়ৰ সন্মুখত আৰু এইমছ-গুৱাহাটীৰ দাঁতি-কাষৰীয়া এলেকাত সঘনাই দেখা দিয়া যানজঁটৰ সমস্যা সন্দৰ্ভত আলোচনা কৰি আৰক্ষী, পৰিবহণ বিভাগ আৰু চক্ৰ বিষয়াক এই সমস্যাৰ সমাধানৰ উপায় বিচাৰি এক যুটীয়া জৰীপ কৰিবলৈ নিৰ্দেশ দিয়ে। আজিৰ সভাত ছয়গাঁৱত যানজঁটৰ সমস্যা দূৰ কৰাৰ বাবে বজাৰ স্থানান্তৰকৰণ, মিৰ্জা চাৰিআলিত যানজঁটৰ সমস্যা আদি সন্দৰ্ভতো আলোচনা কৰা হয়। কামৰূপৰ অতিৰিক্ত জিলা আয়ুক্ত মুনমী কলিতা, ৰঙিয়াৰ সম-জিলা আয়ুক্ত দেৱাশীষ গোস্বামী, কামৰূপ ৰোড চাৰ্কোলৰ অধীক্ষক অভিযন্তা তথা জিলা পথ সুৰক্ষা সমিতিৰ সদস্য সচিব মৃদুল দাস উপস্থিত থকা সভাত জিলা পৰিবহণ বিষয়া মনোজ চৌধুৰীয়ে চলিত মাহত ২৯ জুলাই পৰ্যান্ত জিলাখনৰ বিভিন্ন স্থানত যান বাহন আইন উলংঘাকাৰীৰ বিৰুদ্ধে অভিযান চলাই মুঠ ৪০৩০ টা গোচৰ পঞ্জীয়ন কৰা আৰু ২৫,৪৩,১৫০ টকা জৰিমনা আদায় কৰা বুলি জানিবলৈ দিয়ে। তেওঁ এই সময়চোৱাত ৫৪ খন চালকৰ অনুজ্ঞাপত্ৰ বাতিল কৰা বুলিও জানিবলৈ দিয়ে।
একেদৰে আজি সংহত জিলা আয়ুক্ত কাৰ্যালয়ৰ সভাকক্ষত কামৰূপৰ অতিৰিক্ত জিলা আয়ুক্ত গৰ্গমোহন দাসৰ সভাপতিত্বত জিলা পৰ্যায়ৰ নাৰ্কো ক’ৰ্ডিনেশ্যন চেন্টাৰ কমিটিৰ সভাখনো অনুষ্ঠিত হয়। সভাত জিলাখনত অনুজ্ঞাপত্ৰবিহীন ফাৰ্মাচীৰ নিয়ন্ত্ৰণ, নিচাযুক্ত সামগ্ৰী প্ৰচলন ৰোধৰ বাবে ল’বলগীয়া ব্যৱস্থাৱলী সন্দৰ্ভত বিস্তৃতভাৱে আলোচনা কৰা হয়। সভাত কামৰূপ জিলাৰ আৰক্ষী বিভাগৰ পৰা উপস্থিত থকা উপ আৰক্ষী অধীক্ষক অভিষেক দাসে জুলাই মাহত জিলাখনত নিচাযুক্ত দ্ৰব্যৰ বিৰুদ্ধে অভিযান চলাই আৰক্ষীয়ে ৭ টা গোচৰ ৰুজু কৰা আৰু ১৫ জন লোকক গ্ৰেপ্তাৰ কৰা বুলি প্ৰতিবেদন দাখিল কৰে। লগতে অভিযানকালত ২৫৩.৭ গ্ৰাম হে’ৰইন, ৪৩ সংখ্যক কফ চিৰাপ জব্দ কৰিবলৈ সক্ষম হোৱা বুলিও উল্লেখ কৰে। একেদৰে সভাত চলিত মাহত জিলাখনত অনুজ্ঞাপত্ৰবিহীন ঔষধ বিক্ৰেতা প্ৰতিষ্ঠানৰ বিৰুদ্ধে অভিযান চলাই ৩ খন অনুজ্ঞাপত্ৰ বিহীন ঔষধ বিক্ৰী কৰা প্ৰতিষ্ঠান বন্ধ কৰা আৰু ১ খনৰ অনুজ্ঞাপত্ৰ বাতিলৰ বাবে পৰামৰ্শ দিয়া হৈছে বুলি উল্লেখ কৰা হয়।
